Article 3 mission di IMFna Aruba tabata positivo

ORANJESTAD – Gobierno di Aruba a informa cu  evaluacion di IMF riba Aruba su situacion financiero y economico a sali positivo.

Cada 2 aña IMF ta haci un evaluacion di nos situacion financiero y economico, un asina yama Article 4 Mission. E ultimo dos simannan IMF tabata na Aruba y a hiba conversacion cu tur sector: publico, priva, NGO’s, Gobierno y oposicion. IMF su conclusion na 2017 cu "growth is weak na 2017 a cambia pa "broadly positive" pa 2019.

Dialuna mainta, 1 di april, 2019 IMF a publica e ‘Concluding Statement’ di nan bishita, unda nan ta premira pa 2019, un crecemento economico di 0.7% real, cu ta ekivalente na 2.4% nominal, siendo cu den presupuesto Gobierno a tene cuenta cu crecemento di 1% so nominal. Cu esaki IMF ta mustra cu nan tin confiansa cu economia di Aruba lo crece mas cu a tene cuenta cu ne.

Pa añanan despues di 2019, nan ta premira un crecemento economico real di 1.1%, cu ta ekivalente na 3% nominal, cu tambe ta mas halto cu locual a tene cuenta cu ne den e proyeccionnan di mas aña.

Riba e Plan financiero economico pa pone nos finansas publico bek den e bon rumbo, tambe IMF ta positivo.

Riba e reforma fiscal tambe nan a duna comentario positivo.

IMF a constata cu inflacion aña pasa a yega3.6%, cual tabata debi na prijs di crudo cu a subi, y na e crisis tax cu a introduci aña pasa. Mes momento IMF ta proyecta cu inflacion lo baha e aña aki na 1.7%

E riesgo mas grandi ta e situacion naVenezuela, maske nan ta conclui cu Aruba a maneha pa absorbe e crisis door di tuma pasonan serio pa laga e situacion na Venezuela no afecta nos. por ehempel pa importa fruta y verdura na otro pais. E turismo cu no ta bin mas di Venezuela, ta bin for di otro lugarnan.

Den corto IMF a conclui y a recomenda:

  • E reforma fiscal y e pasonan pa sanea e situacion financiero ta hopi positivo, y ta pidi atencion tambe pa gastonan di salario den Gobierno, y gastonan di AZV.
  • E maneho economico y e 6 sectornan prometedor ta mehora e evaluacion pa Aruba, den nan diversificacion di tursimo, agricultura, etc. y IMF ta hopi satisfecho cu Gobierno tin plannan pa mehora ‘ease of doing business’.
  • Turismo ta creciendo, y mester diversifica. Nan ta recomenda pa Aruba sigui concentra riba brinda calidad halto di servicio
  • Inversionnan den infrastructura ta positivo
  • Siguridad y nos sistema legal ta sigui ta un di e factornan importante pa atrae inversionista
  • Tene cuenta cu aspectonan social
  • Percura pa enseñansa ta alinea cu e necesidadnan riba mercado laboral, pa prepara hobennan  cu  trabou di ofishi ‘vocational training’, y brinda miho proteccion na e trahado
  • IMF ta encurasha nos Gobierno pa continua cu e plannan pa combati corrupción
  • IMF ta positivo riba e progreso haci pa cu data y estadistica a via e cuentanan nacional