Banco Central di Aruba trahando riba un serie nobo di biyetenan di florin

ORANJESTAD - Manera stipula den articulo 7 di e Centrale Bankverordening (AB1991, no.GT 32), Banco Central di Aruba (BCA) ta apunta como e banco di circulacion.

Den e capacidad ey BCA ta e unico banco encarga cu emision di biyetenan di florin via banconan comercial na Aruba.

Esey ta encera cu BCA mester percura cu e biyetenan cu ta circula ta di bon calidad y ta cumpli cu exigencianan halto di siguridad. Esaki pa mantene confiansa den nos florin, contibuyendo asina na un mihor eficiencia y efectividad di nos sistema di pago.

Den e cuadro aki, BCA ta informa cu e ta ehecutando un proyecto pa introduci un serie nobo di biyetenan di florin pa reemplasa e serie actual. E serie nobo di biyetenan di florin lo tin un diseño completamente nobo y lo contene elementonan di siguridad di mas moderno. Pa realisa e proyecto sumamente importante aki BCA a colabora estrechamente cu artistanan local, expertonan local y internacional, y e productor di biyete internacionalmente renombra, esta Crane Currency, cumpliendo asina mas tanto posibel cu standardnan internacional halto.

Riba 2 di mei proximo BCA lo informa e publico Arubano tocante e serie nobo di biyetenan di florin pa asina prepara pa e introduccion di esaki, cual lo tuma lugar den luna di juni proximo.

Fuente: Banco Central di Aruba