Departamento di Salud Publico di Aruba ta alerta riba un caso di measles confirma biahando for di Aruba

ORANJESTAD – Riba 18 di maart 2019 a sali publica Departamento di Salud di New Jersey e emiti un alerta di salud, informando cu riba 04 di maart 2019 un biahero cu measles (sarampi) confirma na Merca a yega Newark Liberty International Airport via terminal C for di Aruba.

Durante estadia di e persona aki na Aruba e por tawata contagioso y por a infecta otronan, p’esey pendiente detaye di e caso aki Departamento di Salud Publico lo cuminsa un investigacion epidemiologico pa localisa casonan sospechoso y tambe esnan cu por tawata den contacto cu e persona aki. Sarampi ta un malesa infeccioso sumamente contagioso cu ta keda un di e causanan di morto prematuro cerca muchanan rond mundo, asina mes cu tin vacuna sigur y efectivo pa esaki.

Sarampi Ta transmiti Measles via gotanan procedente di nanishi, boca of garganta di un persona infecta. E prome sintomanan cu aparece ta normalmente despues di 7 pa 21 dia cu e persona a keda infecta. E sintomanan ta encera keintura halto, nanishi ta basha awa, wowo cora y puntonan blanco den e boca. Despues di un paar di dia ta aparece un rash (uitslag) cu ta cuminsa na e cara y parti di e nek y gradualmente ta plama pa resto di e curpa.

Cu cualkier persona cu tin keintura cu tosamento, wowo cora of nanishi ta basha awa cu of sin historia di biahe pa un pais unda tin measles, mester ta mas alerto pa measles prome cu e sintoma di rash aparece. Esaki pa motibo cu un persona cu measles ta contagioso 4 dia prome cu e sintoma di rash aparece. Ta recomenda pa vigila e personanan aki bon di cerca y si rash aparece e persona mester wordo isola y investiga inmediatamente.

Recomendacion pa practicanan cu ta brinda cuido:

  • Mehora e supervicion riba casonan sospechoso cu ta presenta keintura y rash. 
  • Monitor di cerca personanan local dentro di bo practica cu ta presenta cu sinomanan di measles.

Sarampi Si un persona no por presenta prueba di vacunacion por laga check esaki na seccion Cuido Salud Hubenil. Si no tin prueba cu e persona a ricibi e vacuna por haya esaki na seccion di Malesanan Infeccioso di Departamento di Salud Publico.

Mester raporta tur caso sospechoso na seccion di Malesanan Infeccioso segun   Ordenansa Nacional existente di Malesanan Infeccioso.

Pa mas informacion por tuma contacto cu seccion di Malesanan Infeccioso di Departamento di Salud Publico na 5224221/239/241 of despues di orario di trabou na 5930917.