DPL su meta ta pa trece buscado y dunado di trabou mas cerca di otro

ORANJESTAD - Departamento di Progreso Laboral mihor conoci den comunidad como DPL ta continua cu su servicionan riba tereno laboral p’asina yega na mas y miho oportunidadnan laboral pa nos hendenan local.

Desde cu DPL a habri su portanan na augustus 2011 a cuminsa traha fuertemente riba e proceduranan relaciona cu esnan cu ta busca un trabou y esnan cu ta ofrece trabou (dunadonan di trabou). Un di e metanan principal cu ta keda vigente pa DPL ta di por trece e buscado di trabou mas cerca di e dunado di trabou, trahando na un forma proactivo y mas eficiente posibel na bienestar di nos mercado laboral y nos hendenan local.

Den transcurso di tempo DPL a gana mas experiencia y tambe a adapta e proceduranan aki na bienestar di cliente. A introduci un procedura mas estricto pa loke ta trata entrevistanan laboral caminda cu dunadonan di trabou no por simplemente laga un buscado di trabou pasa yena un formulario di aplicacion cu e promesa di lo yama pa un entrevista.

Pa evita esaki, a introduci un formulario tripel caminda cu ambos partido mester yena y firma despues di e prome entrevista laboral. Di e manera aki DPL por hiba un miho control. Na mes momento ta haya un reaccion mas rapido di e dunado di trabou. Esaki ta parti di e maneho nobo di DPL.

Edificio  Departmento di Progreso Laboral

Mirando cu Departamento di Progreso Laboral ta consciente di e situacion dificil di esun  cu ta buscando trabou, ta purba na haci e proceso aki mas rapido y eficiente posibel pa e cliente. Tur cliente cu acerca DPL ta ricibi un bon informe verbalmente y por escrito (firma un acuerdo) riba e proceduranan di solicitud. Na mes momento e cliente ta haya tur tip necesario p’asina por ta bon presenta y prepara pa su solicitud.

DPL ta comprometi na haci tur locual ta na su alcance pa esun cu ta buscando trabou haya su prome entrevista laboral y/of haya e trabou di biaha. E decision final si ta tuma un hende den servicio of no semper ta keda den man di e dunado di trabou.

Si e empresa nenga, esaki lo mester ta bon argumenta cu motibonan valido. Na momento cu un persona no haya e trabou semper e lo por regresa DPL p’asina sondea e posibilidadnan laboral na un otro caminda.

DPL mes no ta duna trabou pero ta prepara bo, haci tur e prome pasonan di haya un entrevista laboral y despues manda bo solicita cu un cita na e dunado di trabou. Ta brinda tur e servicionan aki gratis na tur buscado di trabou y ta dirigi solamente riba nos localnan. E proceso di busca y haya un trabou ta uno dificil pa hopi buscado di trabou. Ainda tin personanan cu ta den e proceso aki sin exito. E ta exigi hopi di bo mes como persona manera entre otro; persistencia, abilidadnan social pa comunica y bende bo mes como e miho candidato, bo imagen personal (impresion) y bo experiencia laboral. Tur esaki ta primordial den yuda e candidato haya un trabou.