International Day of Forests: Stima nos mondi

Dit item is gearchiveerd op 25-04-2019.

ORANJESTAD - United Nations General Assembly na 2012 a proclama 21 di maart como “International Day of Forests” (IDF).

Na Aruba nos no conoce “forests” areanan forestal, pero si mondi cera di Mangel, manera na Spaans Lagoen, Mangel Halto y Isla di Oro.

Mondi na ArubaDNM ta haci inventarisacion den mondinan na Aruba. Ta inventarisa ki sorto di mata tin presente y ki bestianan ta biba na e lugar aki. Ta celebra e dia aki door di conscientisa pueblo di Aruba riba e importancia di e mondinan pa Aruba.

Ariba tur International Forest Day ta encurasha paisnan pa tuma initiativanan local, nacional y internacional pa organisa actividadnan cu ta envolvi conscientisacion di areanan cu tin mondi cera y tambe plantacion di matanan. Un initiativa por ehempel ta plantamento di cantidad di mata   of actividadnan pa muchanan unda nan por siña di e matanan local of di selvanan y mondinan di otro paisnan.

E tema y lema pa 2019 di International Day of Forests ta Forests and education; Learn to Love Forests (Mondi y educacion; Siña stima nos mondi).

Ta importante pa comparti e informacion aki pa yuda e futuro generacion compronde mas di nos recursonan natural. Pa nan ta consciente di e importancia di mondinan y e matanan pa nan futuro. Ban siña nos muchanan di chikito caba pa conecta cu naturalesa na un manera respetuoso y coexisti cu naturalesa y no solamente biba di naturalesa (tuma y duna bek na naturalesa).

Awendia mas cu mitar di e poblacion mundial ta biba den cuidadnan y mas y mas ta biba desconecta di naturalesa. P’esey ta importante pa conscientisa riba e beneficionan di mantencion y preservacion di mondinan y vegetacion. E areanan aki ta yuda tene e aire, suelo, awa y hende sano. Nan tin un rol masha importante ora ta atende y combati  fenomenonan actual manera cambio di clima y hamber na mundo.   

Pakico ta celebra “International Day of Forests”?

Aruba no conoce areanan di mondi grandi debi cu nos ta un isla cu espacio limita. Cu mas rason nos mester cuida y proteha nos mondinan y vegetacion.

Meta deasroyo sostenibel #15: Bida riba teraHopi biaha ta neglisha areanan manera mondi of ta desaroya e areanan aki sin mas. E actitud aki ta haci’e mas dificil pa yega na e metanan mundial pa desaroyo sostenibel (SDG’s). E areanan di mondi ta forma parti di bo bida diario den hopi forma sin cu bo mes ta realisa. SDG #15 ta bisa pa proteha, restaura y promove uzo sostenibel di e ecosistemanan continental, maneha e selvanan y mondinan un forma sostenibel, combati formamento di desierto, stop degradacion di tera y drey e bek y stop perdida de biodiversidad.

Ademas areanan di mondi y vegetacion ta duna nos oxigeno, ta duna nos di come, ta brinda sombra, ta embeyece nos paisahe y ta mantene nos biodiversidad. Ta importante pa siña e conexion di e areanan aki cu nos bida diario. Pa medio di educacion nos por pasa e conocemento pa nos muchanan p’asina nan siña stima naturalesa y matanan. Siña nos muchanan mas di nos leynan cu ta proteha matanan (flora) local y pa duna un aporte door di planta mas mata. Tambe establece sistemanan di maneho sostenibel di e areanan unda tin mondi y di e forma ey conserva e biodiversidad riba tera.

Poster Dia Internacional di Mondi 21 di maart 2019

Maneho sostenibel di areanan di mondi ta resulta den comunidadnan fuerte cu un economia cu ta prospera.

DNM ta felicita un y tur riba e dia aki cu e mensahe positivo pa encurasha nos muchanan pa ta mas consciente y aprecia nos mondinan, pero tambe siña di otro paisnan cu si conoce diferente mondi y selvanan.