Lugar di eutanasia di cacho ta cera temporalmente

Dit item is gearchiveerd op 20-04-2019.

ORANJESTAD -  Servicio Veterinario ta informa cu for di 22 di maart te cu dia 07 di april 2019, su localidad situa na Wayaca 128-A conoci como “Kill Cage”, lo ta cera temporalmente pa renobacion y mehoracion di su servicio.

Den pasado e localidad aki tawata habri pa publico 24 ora pa dia 7 dia pa siman. Esaki pa evita cu ta tira animalnan over di muraya, loke den pasado a sosode. Cu e renobacion aki lo bay construi un dak pa e localidad y tambe lo bay introduci dia y orarionan stipula pa por trece of busca animal.

Esaki ta e prome stap pa trata na regula e proceso di eutanasia di animalnan no desea y tambe mehora e servicio pa cu e animalnan cu ta wordo entrega y busca. Durante e periodo di renobacion aki, nos kier pidi comunidad pa no trece y tampoco laga atras animal na e localidad of riba caya. Preferibel wantanan of busca ayudo cerca un di e diferente fundacion of organisacionan cu ta dedida na busca doño adoptivo pa e mascota.

Meta di e localidad aki ta pa evita cu animalnan no desea ta termina riba caya, cu tin como consecuencia cu e populacion riba caya ta sigui crece. Animalnan riba caya sa ocasiona problemanan manera accidente di trafico,  ataque contra deportistanan y como tambe contra otro animalnan di cria manera cabrito.

Departamento di Salud Publico ta pidi comunidad pa sterilisa boso mascota pa di e manera aki hunto nos traha na reduci e cantidad di animalnan cu ta sufri riba caya.

Pa mas informacion por tuma contacto cu Servicio Veterinario di Departamento di Salud Publico  na 5224200/ 5850400.