Reunion Prome Minister di Aruba cu Comision di Reino di Eerste en de Tweede Kamer.

ORANJESTAD – Recientemente Prome Minister di Aruba Sra. mr. Evelyn Wever-Croes a reuni riba su propio peticion cu e Comision di Reino di Eerste en de Tweede Kamer

Segun Prome Minister e ta haya cu ta importante e miembronan di Kamer tende di dje mes con e situacion na Aruba ta. E crisis na Venezuela tin un impacto enorme riba nos isla. Cu capacidad y recurso limita nos ta purba di enfrenta e impacto di e crisis aki. Tambe Prome minister a informa e miembronan di Kamer cu tin dos otro aspecto importante cu ta finansas publico y integridad; dos punto crucial di Gabinete Wever-Croes. 

FINANSAS

De e reunionan Prome Miniser a duna un update riba e situacion financiero di Aruba, unda e la indica cu ainda Aruba no a sali for di problema, pero tin un plan y a haci palabracion nobo cu Hulanda y e plan ta pa cumpli cune. Impacto di crisis na Hulanda ta substancial riba nos finansas publico y kisas por afecta nos plan, door di cua lo mester adhusta esaki, pero lo tuma un decision despues di evalua e cifranan di e prome mitad aña.

Reunion Prome Minister Evelyn Wever-Croes cu Kamerleden na Den Haag

INTEGRIDAD

Prome Minister tambe a informa tocante e trayecto di integridad cu pa Gabinete Wever-Croes ta un di e puntonan crucial pa preveni escandalo di corupcion. Gobierno di Aruba a institui un trayecto di integridad ambicioso, esta Oficina di Intergridad, Camber di Integridad, Corporate Governance Code  y ratificacion di e tratado di anti-corupcion di Nacionnan Uni

SUPERVISION FINANCIERO PROPIO

Aruba ya ta prepara su mes pa substitui e supervision financiero imponi door di Hulanda cu su propio organo di supervision ( Begrotingskamer). Pa e motibo aki Prome Minister a reuni na Den Haag tambe cu Algemene Rekenkamer cu a redacta un raport basta critico tocante e supervision financiero door di CFT na e islanan BES. Segun Prome Minister nos kier siña di esaki p’asina e Begrotingskamer di Aruba por funciona bon mesora.

Segun Prome Minister e reunionnan na Den Haag tabata positivo. Tin mas comprension pa posicion di Aruba y e ta haya importante cu nan ta scucha di dje mes na Den Haag con e situacion na Aruba ta.