Maneho financiero

Cada gabinete ta stipula su programa di gobernacion. For di e programa di gobernacion ta sigui elabora e terenonan di maneho den notanan di maneho concreto. E metanan financiero cu gobierno kier alcansa y con pa realisa e obhetivonan ta indica den e notanan di maneho. Ora di stipula maneho financiero-economico ta necesario na prome luga pa determina kico e maneho tin como meta.

“E control y subsecuentemente e disminucion den e volumen di tanto e deficit presupuestario como e quota di debe di Pais Aruba”

Pa por alcansa e obhetivo stipula tin cu proba cu e deficit financiero, di berdad a baha na e forma desea y lo keda mantene na cero pa un cantidad di aña. Esaki ta den corto e midi pa resultadonan financiero. E meta final riba termino corto ta pa alcansa un presupuesto balancea (e asina yama “balanced budget’) na aña 2018 y e disminucion di e nivel di debe. E obhetivo pa baha e debe ta debi cu aunke riba un termino cortico bou di cierto circunstancia un deficit financiero ta deseabel pa por ehempel preveni un recesion economico, di otro banda riba un termino largo un debe cu ta sigui aumenta ta nifica cu pa Aruba ta resta menos recurso pa inverti den facilidadnan publico necesario y den e aparato gubernamental.

Den practica e obhetivo ta encera control riba e consecuencianan financiero di e maneho hiba y principalmente e maneho gerencial di Pais Aruba. Esaki ta basa riba e stipulacion di e espacio financiero disponibel di e diferente terenonan di maneho (manera educacion, salud publico, seguridad, infrastructura etc.). E espacio financiero ta stipula door di Conseho di Ministro bou guia di e Ministro di Finansas. Ta importante pa pone prioridad tanto dentro y entre e ministerionan. Di e manera aki e desaroyo continuo di un sociedad prospero y ordena ta bira posibel.

Despues di inventarisa e initiativanan y e actividadnan cu lo ehecuta pa cada tereno di maneho, e siguiente paso ta pa pone prioridadnan. Ta for di esaki ta haya un idea for di unda por stipula diferente escohencia di maneho cu mester por inclui nan den e cuadro financiero. Si inclui esakinan ta resulta di ta difícil of imposibel, e ora ey ta pospone c.q. temporisa e maneho. Esaki ta nifica cu ta aplasa e implementacion di e initiativanan di maneho pa un fecha posterior.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki